Hemmeler sylaýar «kiçigöwüni»,

Ol bolsa sylagdan humardyr humar

Öwülse,

Keýp bilen süzüp gözüni

Diýer «Ýok, adamlar, kemçiligim bar?»

Onsoň gussa bilen saňa garar-da,

Kemçiligin sanar

Okýan deý aýat.

Onuň kiçigöwünligi barada

Dörär şeýdip, ýene-de bir rowaýat.

Öwüleni üçin

Olam öwen bor.

Üns bilen diňlär ol, ýakymly gürlär...

Awtobusda boş bolsa-da onlap ýer,

Giren goja öz ornuny hödürlär.

Ýöne bir gün düşse tankyt astyna,

Ol hakyky ýüzün açar dessine.

Uwlar ol,

Ýarar ol gazapdan doly,

Guýrugna basylan möjek mysaly.